د.عبدالرحمن المهدي عبدالقادر محمد
سلام سِكّر بي اهلا قوفا مُنقا
دبايوا دليبا ركّوجا تمر ومَنقا
خوتنا بتفك كل زنقة
شوايقة زغاوة ارتيقا و تندقا
دي إلفة قديمة ليها قرون طويلة
دي ما بتنهدا بين يوم وليلة
إذا ما جاتنا عسرة سوا بنشيلا
إذا صابتنا فتنة سريع نزيلا
اسود احمر اصفر واخضراني
دي ألوان في الجلد مافي المعاني
بطاقات للتعارف والتداني ولوحة جميلة مافي مثيلا تاني
نجوع نأكل مِرِس كابيدا بفرة
سلات وكجيك ومندي وكسرة وافرة
محل تنزل تجيك صينية دافرة
كرم سوداني فيهو سماحة سافرة
بعد ما شبعنا ديك كوازتنا بره
نغم طمبورنا ناخد فيهو جرة
نحاسنا يدق و نقارتنا كِرة
ونعرض عرضة سودانية حرة
ديمقراطية في حرية يلا
كراسي كنيسة جمب بِرش المصلى
شمالي جنوبي شرقي وغربي كلا
اوشيك الدومة نجم الدين وبلة
وطني وشعبي امة واتحادي وختمي صوفي انصاري وجهادي
هم ألوان طيفنا اصحاب المبادي
امان أمتنا في وجه الاعادي
خت أرضا سلاحي مع سلاحك
و خت أرضا رغيفي وجيب ملاحك
نشيل من زرعي واكل من مُراحك
وتضمد جراحي على جراحك
